Presidente Erdogan ta sospechá ku tin otro paisnan tras di “coupe” na Turkia.

Den un entrevista ku e kanal árabe Al Jazeera, Recep Tayyip Erdogan, a sugerí ku tin otro paisnan tras di e “coupe” frakasá, ku a tuma lugá siman pasá na Turkia. E no a bisa sí kua ta e paisnan ku e ta sospechá. Djis despues di e entrevista, Erdogan a deklará un estado di emergensia na Turkia. E situashon di emergensia lo keda bálido pa tres luna. Segun e Presidente, ta un parti chikí di su ehérsito ku kier a imponé deseo di minoria riba un mayoria, a orkestrá loke a pasa. Erdogan a señalá te ku awor solamente Fethullan Gülen komo kulpabel pa e aktonan. Gülen ta biba for di 1999 na Merka i Turkia a pidi su ekstradishon. Miéntras tantu mas di 50mil persona a keda arestá, kitá for di trabou i saká for di nan funshon. Mayoria ta militarnan, weds i maestronan di skol.