Pa di dos siman siguí gobièrnu venezolano a habri frontera pa pèrmití famia kumpra kuminda i gasolin na Colombia. E situashon na Venezuela ta sigui tenso debí na e inflashon kresiente, importashon limitá i bahada di preis di petroli. Gobièrnu a sera frontera ku Colombia, pasó ta konsiderá ku e kontrabanda na e frontera tabata kontribuí na e situashon di skarsedat na Venezuela. Sinembargo e skarsedat a sigui krese i gobièrnu a disidí den kombenio ku Colombia pa pèrmití hendenan krusa frontera pa kumpra na Colombia. For di 6or di mainta tabatin reinan largu di hende ku a biaha mas ku 8 ora pa yega San Antonio de Táchira pa por krusa frontera. Militarnan tabata mantené òrdu, miéntras aktivistanan tabata parti pamflèt kontra gobièrnu venezolano. “E kos akí ta masha tristu, pero nos sa ku aya si nos ta haña algu”, asina un ansiana di 70 aña a konta. Riba e promé dia mas ku 35 mil siudadano a partisipá na e "corredor humano" entre Venezuela i Colombia.
Multitut grandi di venezolanonan na frontera pa buska kuminda na Colombia.