Ministerio di GMN a kuminsá ku e preparashon pa e proyekto ‘Kunukito Hidropóniko’. E proyekto ta e di 4 fase den e koperashon entre ministerionan di GMN i MEO, Adeck, ku ta e organisashon di empresanan chikí i mediano, APC (Agencia Presidencial de Coperacion) i Universidad de la Guajira di Colombia, riba tereno di ‘food and nutrition security’. E koperashon konkreto entre e organisashonnan a kuminsá for di 2016.
E proyekto ‘Kunukito Hidropóniko’ ta enserá entre otro ku ta bai implementá 7 diferente téknika òf sistema di produkshon agrario riba tereno di AVB (ántes LVV). A limpia 5000 m2 di un total 33 hèktar di tereno na AVB pa ehekutá e proyekto.
E 7 téknikanan di produkshon agrario di proyekto ‘Kunukito Hidropóniko’ ta :
1.Plantamentu den baki di palu den un supstansha ku awa ku ta kontené 14 nutriente. E téknika aki ta duna bon resultado ku plantamentu di kròpsla.
2.Plantamentu den baki di palu den un sustrato di klei, kaska di aros i supstansha ku ta kontené nutriente. E téknika aki ta duna bon resultado ku plantamentu di kònkòmber, promentòn, tomati i silantro.
3.Plantamentu den pipanan di PVC. E téknika aki tambe ta duna bon resultado ku plantamentu di kròpsla.
4.Plantamentu den saku di plèstik pretu ku diferente sustrato. Un bon téknika i simpel pa produsí chili peper i promentòn.
5.Organoponia. Téknika di produkshon ku ta hasi uzo di sustrato di “vermicompost”, klei di laman, santu i kaska di aros. Organoponia tambe ta duna bon resultado ku plantamentu di promentòn, tomati i salada.
6.Biofertilisante den 2 kiosko. Téknika di produkshon di nutriente orgániko.
7.Téknika pa produsí kuminda di bestia. E tereno ya ta limpiá i egalisá. E profesornan di Riohacha entre tantu ta na Kòrsou kaba i huntu ku AVB ta trahando por riba diseño i ubikashon di e diferente téknikanan di produkshon agrario.