Hopi emboltura di ‘fastfood’ na Merka ta kontené supstansianan peligroso i elementonan ku ta okashoná kanser. Despues di un estudio, a sali na kla ku investigadónan a haña prueba ku tin fluor den entre otro e kahanan di hamburger i bakinan di batata hasá. E resultado a keda publiká pa Environmental Science and Technology.
Anteriormente a relashoná e supstansianan kímiko kaba ku kanser, imunotóksisidat, glándula tiroide i otro problema ku salú. E supstansia por pasa dor di e emboltura i kai den e alimento. Pa e investigashon a buska kasi 400 emboltura di restorantnan fastfood na Estádos Unídos. A midi e kantidat di fluor den e embolturanan ku yudansa di spektroskopia. A resultá ku 38 porshentu di e burger i emboltura di e pan ta kontené e supstansia. Esaki ta konta pa 20% di e bakinan di papel, ku ta bende e batata hasá aden. “E supstansia por drenta den e via sanguíneo i akumulá ei den,” asina Graham Peaslee, profesor di universidat di Notre Dame ku a investigá e emboltura, a bisa. “Nan ta keda den e kurpa relativamente largu pasobra nan no ta ser kibrá. Esaki ta un bèl di alarma pa e negoshinan di fastfood i nan klientenan.”