Segun dr.Radjid Steingrover di laboratorio nashonal ADC tin un kresementu hopi drástiko den kantidat di tèst positivo riba Zika. Den e último periodo, tur siman mas ku 100 hende a tèst positivo. Ku un kantidat grandi asina por bisa ku Zika ta un epidemia. E kantidat di kasonan di Zika a oumentá resientemente debí na hopi áwaseru. ADC a risibí hopi mas petishon ku nòrmal pa hasi tèstnan riba Zika pero tambe pa Chikungunya i Dengue. Sinembargo hopi tèst riba Chikungunya a sali negativo. Si tene na kuenta e kantidat grandi di tèst pa Dengue, esei ta nifiká ku ainda Dengue ta paresé na Kòrsou. Steingrover a indiká tambe ku e kantidat di tèst riba Zika lo baha paso GG, GZ i SVB lo no kompensá e tèstnan mas. Dòkternan di kas lo no manda pashèntnan mas, ku ta sospecha di tin Zika, pa un spesialista. Esaki ta keda solamente den man di spesialista, en partikular ginekólogo. Pues mayoria tèst pues lo keda hasi riba hende muhénan na estado.