Den un komunikado, e kompania BearingPoint a konfirmá ku èks minister di finansas José Jardim ta bai bèk pa sektor públiko. Na yanüari último, José Jardim a start na BearingPoint pa aportá na e ambishonan di ekspanshon den region, di e kompania. For di e ophetivo pa hasi uzo di kambionan di modernisashon drástiko den servisio públiko komo katalisadó pa un presupuesto balansa, José tabatin afinidat ku e métanan i areanan di trabou di BearingPoint i tambe eksperensha riba tereno relevante.
Durante e último lunanan, José Jardim a sa di hunga un ròl importante entre e organisashon i su kliente. Su vishon i liderasgo riba tereno di proyektonan di transformashon fundamental kaminda “IT” ta hunga un ròl determinante, tabata imperativo den esaki. Den e periodo ei, el a demostrá di ta un partner ekselente pa yuda BearingPoint ekspandé su ambishonnan stratégiko den region.
Entretantu José Jardim a duna di konose ku su pashon i ‘drive’ ta keda tòg mas den e sektor públiko i ku esaki ta yegá na su kurason. Esaki ta tambe e motibu prinsipal pa e bai bèk sektor públiko.
BearingPoint tin tur konfiansa ku den e ròl akí, José lo sa di kontribuí un biaha mas na progreso di nos ekonomia i servisionan na públiko.
Di un akuerdo mutuo a disidí ku José Jardim lo redusi su trabounan na BearingPoint i ku riba korto plaso e lo regresá na e Ministerio di Finansas komo Sekretario General.
BearingPoint ta deseá José eksito den futuro.