Djamars atardi sinkor, trahadónan di e kompania di seguro Ennia a tende ku Gilbert Martina no ta direktor mas di e kompania. Na su lugá, Ralph Palm, ku ta presidente di kompania lo tuma e puesto ofer, asina korant Extra a informá. Martina tabata direktor di Ennia for di aña 2007, pero awor a opta pa ‘aspirá pa ophetivo personal’, segun e informe na trahadónan. Ennia a gradisí Martina i a indiká mesora ku e kompania a start ku e proseso pa yega na un susesor. Otro medio a indiká ku ta trata di retiro pa e direktor di Ennia i ku esaki tin di haber ku un resiente ‘screening’ di Banko Sentral di Ulanda, ku supuestamente Martina no a pasa. Riba e informe akí, Ennia a bisa ku esaki no ta bèrdat. Aña pasá a sali un informe den korant Ulandes riba e posishon di kompania Ennia. Medionan Ulandes a raportá e tempu ei ku doño di Ennia, e empresario Iranes-Merikano Hushang Ansari lo a pluma e kompania. Ansari lo a invertí mas ku 500 mion euro (1000 mion florin) di aseguradonan den su propio projektonan. E minister di Finansas Ulandes di tempu ei, Jeroen Dijsselbloem a bisa di ta prekupá ku e situashon. Komo direktor di Ennia, Gilbert Martina a deklará na e momentu ei ku klientenan di Ennia no mester prekupá i ku esnan ku tin un polisá na e kompania por ta trankil pa ku nan sèn.