Pakusnan no por ninga un kliente pa swaip montantenan abou ku nan karchi Maestro. Debí na reklamo di klientenan, e asuntu a lanta kabes algun biaha kaba durante aña pasá. Entre tantu, bankonan tambe a hala atenshon di komersiantenan riba e asuntu. No opstante e kantidat di kehonan na MCB, ku ta e banko ku mas tantu mashin di swaip (4500 mashin) a baha, ainda tin komersiante ku no ta tene nan mes na e regla akí. Presidente di Asosashon di Bankero di Kòrsou, Daniel Hodge ta haña komprendibel ku un komersiante ta kobra un tarifa pa por swaip pa sierto montante abou, ya ku e komersiante ta paga ún tarifa pa e mashin di swaip i tambe tin kostonan di transakshon. Na paisnan mas grandi e volúmen ku ta swaip ta muchu mas grandi pues e kostonan pa transakshon no ta signifikante, pero riba un merkado chikí manera Kòrsou si e komersiante ta keda afektá pa esaki. Sinembargo kobra e kliente pa por swaip un montante abou ta kontra di regla ya ku na momento ku un komersiante atkerí un mashin di swaip e ta drenta un akuerdo ku e banko en kuestion.