Sospechoso den investigashon Emerald na St.Maarten, ta keda den aresto preventivo.


E sospechoso O.A. (35) den e investigashon yamá Emerald ta keda den aresto preventivo. Esaki hues komisario a disidí djamars 6 desèmber 2016 na Kòrsou. A arestá O.A. dia 28 novèmber 2016. E ta sospechá di froude ku impuesto, falsifikashon di dokumento, labamentu di plaka i poseshon illegal di arma di kandela. Dia 28 novèmber e tim pa kombatí kriminalidat (TBO) di “Recherche Samenwerkingsteam” (RST) den koperashon ku Landsrecherche St.Maarten, bou di guia di un hues komisario a hasi shete entrada hudisial den kuadro di e investigashon Emerald. A bai na kas di e sospchoso, den ofisinan di e outoridat di haf na Sint Maarten i na un kompania di seguridat. Durante di e entradanan hudisial a konfiská dokumento, atministrashon, portadónan di informashon digital i un arma di kandela. A konfiská tambe, sinku outo luhoso, algun kuenta bankario, un yate i kas di e sospechoso. Outoridatnan na Anguilla, riba petishon di outoridatnan di St.Maarten, a konfiská propiedat inmóbil i kuentanan bankario di e sospechoso na Anguilla.

E investigashon ta den ful swing i no por ekskluí ku mas aresto lo kai òf mas entrada hudisial lo tuma lugá. E investigashon Emerald a kuminsá na 2016 abase di artíkulonan den korant i preguntanan den Parlamento riba un kòntrat entre e kompania di seguridat di e sospechoso i e outoridat di haf na Sint Maarten. Durante di un investigashon, e sospecho a lanta riba froude ku impuesto, falsifikashon di dokumento i labamentu di plaka.