Ministerio Públiko a pidi 18 aña di prizòn pa pastor i apòstel O.B. mihó konosí komo Lando. Ta akusá e hòmber di 10 kaso di inmoralidat seksual i violashon. E kasonan a tuma lugá ku miembronan di su propio iglesia. Fiskal Ludmilla Forbes-Vicento a tuma un ora i mei pa splika wes detayenan di e kaso. Den e kaso tabatin diferente menor di edat envolví i ku a bira viktima di O.B. Durante e tratamentu di kaso, e fiskal a laga skucha un grabashon ku un di viktimanan a hasi ku O.B. i su kasá, kaminda Lando ta atmití ku el a hasi algu robes dor di tene relashon ku e hoben. Den e grabashon por a skucha kon O.B. ta pidi pordon pa loke el a hasi. O.B. a splika tambe ku e no ke buska niun preteksto i ku ta mihó e bai será. Por a skucha tambe kon O.B. i su kasá kier a laga e viktima sinti su mes kulpabel, dor di bisa ku ta ta e viktima mes a provoká O.B. Fiskal a Forbes-Vicento a mustra riba e poder ku O.B. tabatin den su organisashon, kaminda ku e por a hasi i deshasí, i esun ku bai kontrá dje ta ser saká for di e iglesia. E fiskal a splika wes di e impakto ku e kaso tabatin den komunidat. Na momentu ku e promé viktima a sali, otronan tambe kier a papia, pero nan tabatin miedu, debí ku tabatin miembronan di kuerpo polisial ku tabata forma parti di e iglesia. A opta pa interogá e viktimanan na un sitio diferente. No opstante e kantidat di viktima, den e kaso di O.B. tin mester di solamente ún kaso ku sufisiente prueba. Tin deklarashon di sinku persona ku a bira viktima durante e periodo ku nan tabata menor di edat.
Fiskal a repasá deklarashon di tur e dies viktimanan ku a hasi denunsia, pa mustra wes ku O.B. tabatin un partonchi di operashon. E tabata isolá su viktimanan, pa dominá i habusá di nan. Na final e tabata duna na un pulchi pa nan no sali na estado. E tabatin poder riba mayoria di e viktimanan, debí ku nan tabata den situashon vulnerabel. Basá riba tur e pruebanan ku a akumulá fiskal a pidi 18 aña di prizòn, ademas un prohibishon di 20 aña pa ta den kualke funshon di liderazgo. Dian 5 di yüli pa dosor di mèrdia, Korte lo dikta sentensia.