Schotte i Van der Dijs a bisa wes ku nan ta inosente.


E di tres dia di tratamentu di kaso babel kontra parlamentario i lider di partido polítiko Gerrit Schotte i su pareha Cicely van der Dijs a tuma lugá riba djarason. Abogado Knoops a reanudá ku defensa di e akusadonan i despues a tuma lugá ‘repliek’ i ‘dupliek’ i e último palabra di e akusadonan. ‘Repliek’ ta na momentu ku Ministerio Públiko ta refutá loke defensa a bisa. ‘Dupliek’ ta duna defensa oportunidat pa reakshoná riba e ‘repliek’. E akusashonnan kontra Schotte i van der Dijs ta labamentu di plaka, ‘jammers’ ilegal i denunsia falsu di pasport pèrdí. Abogado Knoops a indiká ku pa loke ta e akusashon relashoná ku labamentu di plaka, si no por konfirmá falsifikashon di dokumento, tampoko por konfirmá labamentu di plaka. Pa labamentu di plaka, e aktonan di e akusadonan lo mester tabata dirigí riba skonde fondonan i según Knoops, esaki no tabata e kaso. El a bisa mas aleu ku e transakshon di van der Dijs tabata normal. E sèn ku supuestamente e akusadonan a risibí, pa kual ta akusá nan di labamentu di plaka, tabata pa finansiá kampañanan di partido MFK i no pa uzo propio. Es mas, e promé finansiadó di MFK tabata MCB, despues Corallo. Knoops a bisa tambe ku tur donashon ku MFK a risibí tabata registrá korektamente. Pa e akusashon relashoná ku labamentu di plaka, Knoops a pidi apsolushon di kulpa (vrijspraak) pa ámbos akusado.

Uzo ilegal di ‘jammers’. Despues abogado Knoops a sigui su defensa riba uzo ilegal di ‘jammers’. Según Knoops, e ‘jammernan’ ku Schotte a uza, no ta kai bou di esnan ku ta prohibí i aparte di esei un di e ‘jammernan’ tabata dañá. Schotte a buska e ‘jammernan’ despues ku el a diskubrí un aparato pa skucha kombersashon den su outo. Schotte a hasi denunsia di esaki, pero Ministerio Públiko no a hasi nada. Knoops a bisa ku ta trata di un persekushon arbitrario, ya ku Buro di Telekomunikashon mes por a trata ku e asuntu. Pa e ‘jammernan’ Knoops a pidi ‘ontslag van rechtsvervolging’. Esaki ta un veredikto kaminda ta prueba e presunto delito, pero e delito no ta kastigabel. Pa Van der Dijs Knoops a pidi apsolushon di kulpa.

Pasport pèrdí. E último punto di e defensa a trata e denunsia falsu, tokante pèrdida di e pasport diplómatiko. Knoops a bisa ku tabata un eror honesto, kaminda Schotte no tabata sa na unda el a pone su pasport. Na e momentu ei e tabata den mudansa for di su kantor den Fort Amsterdam. Schotte no tabatin akseso na e kluis kaminda a haña e pasport. Ademas na momentu ku hasi denunsia, outomátikamente e pasport ta bira imbálido, pues Schotte no por a hasi nada kuné.

Defensa di Ministerio Públiko. Despues di e defensa, Ministerio Públiko a trese su ‘repliek’. Den esaki diferente punto a keda enfatisá i a indiká ku mester enkarselá Schotte, ya ku e probabilidat ku e akto lo ripití ta grandi. Ademas e no ta konsiente, ni ta aseptá di a hasi algu robes. E defensa di Schotte a sigui ku nan ‘dupliek’ i a trese vários punto dilanti. Por ehèmpel, nan ta di opinion ku Ministerio Públiko no a tuma e argumentunan di Korte Europeo ku e tim di defensa a trese dilanti na serio. Tambe ku Ministerio Públiko ta basa nan mes riba loke a sali den media. Por último e akusadonan Schotte i van der Dijs a hiba palabra. Ámbos a bisa di ta inosente i ku nan derechinan a keda trapá. Schotte a indiká ku e ta spera ku e ta keda apsolv’é di tur akusashon. Finalmente wes Radder a indiká ku lo no sera e investigashon mesora, pero dia 11 di yüni. Dia 21 di yüli, kuartu pa dos di mèrdia lo duna veredikto den e kaso Babel.