Prokuradornan General di Reino a topa na Boneiru.


Prokurador General (PG) di Kòrsou, Sint Maarten i islanan BES, Guus Schram, a bishitá Boneiru pa e reunion bi-anual di prokuradornan general den Reino. PG-nan di Kòrsou, Sint Maarten islanan BES, PG di Aruba i un miembro di kolegio ulandes di Procureurs-Generaal ta reuní dos bia pa aña. Entre otro nan ta reuní tokante e “Justitieel Vierpartijen Overleg”. Mayoria bia ta trata di sinkronisashon pa ku puntonan riba tereno hudisial i koperashon entre paisnan den Reino. E interkambio tin komo meta pa laga e Ministerionan Públiko di e diferente paisnan benefisiá mas tantu posibel di e echo ku nan ta den mesun Reino. A papia entre otro tokante estado di aplikashon di lei i e manera ku por saka mas tantu rendimentu for di investigashon i rapòrtnan ku e “Raad voor de Rechtshandshaving” ta emití. A interkambiá tambe di idea i yega na akuerdonan konkreto kon por mehorá i hasi koperashon entre Landsrecherche Kòrsou, Sint Maarten i Aruba ku Rijksrecherche di Hulanda mas intensivo. Na momentu ku Kòrsou i Sint Maarten a opta pa bira outónomo den Reino, a stipulá e asina yama Leinan di Konsenso. Easkinan tin komo meta pa salbaguardiá e responsabilidat di Ulanda pa tin bon maneho di paisnan den Reino. Ta leinan ku ta konta den hinter Reino, entre otro Lei di Konsenso pa Ministerio Públiko di Kòrsou Sint Maarten i islanan BES, Lei di Konsenso di Korte di Hustisia Komun i Lei di Konsenso pa Maneho di Lei.