Aktualmente a registrá 800 kaso di Zika na Kòrsou. Esaki ta loke epidemiólogo Izzy Gerstenbluth, a duna di konosé na nòmber di Ministerio di Salubridat, Medioambiente i Naturalesa. A detektá un oumento den e kantidat di personanan ku ta mustra síntomanan di Zika. Den sierto kaso e pashèntnan tin hopi grawatashi di kurpa. Ademas Gerstenbluth a bisa ku por tin un otro vírus tambe, pero esaki no ta sigur, ya ku e vírus ta manifestá di otro forma riba tur hende. E epidemiólogo ta bisa tambe ku e vírus Mayaro tambe a keda detektá den region di Karibe, pero e vírus aki ta keda transmití dor di un otro sangura ku e vírus di Zika. Te asina leu ku ta konosí e sangura en kuestion, no ta paresé na Kòrsou, pero no ta deskartá e posibilidat. Den un komunikado di prensa di e ministerio di saluá, ta alertá hende muhénan na estado pa paga tinu. E vírus di Zika por kousa daño na e baby den tur tres trimèster di embaraso.