Schotte a bisa wes ku awor si nan lo papia.


Djarason mainta a a kuminsá ku tratamentu di e “regiezitting” den apelashon di kaso Babel. Ta akusá Gerrit Schotte i Cicely van der Dijs di labamentu di plaka, korupshon administrativo, poseshon ilegal di “jammers” (aparatonan pa stroba señal) i denunsia falsu di pasport diplomatiko pèrdí. Dia 11 di mart, e akusadonan a keda sentensiá, pero a apelá e desishon di Korte den Promé Instansia. Durante e “regiezitting”, e tres wesnan ta duna partidonan oportunidat pa indiká nan deseonan den kuadro di tratamentu di e kaso. E wesnan ku lo trata e kaso ta D.Radder, P.Le Maire i G.Lewin. E fiskalnan pa Ministerio Públiko ta G.Rip i L.Angela. Den un promé reakshon, abogado Geert Knoops di e tim di defensa (abogadonan Knoops, Baaijens i Vaders) di Shotte/van der Dijs a splika ku nan lo atendé e kaso según dos punto di salida. Primerante e wak si e manera kon a start e investigashon a bai di akuerdo ku lei. Ademas el a laga hasi algun investigashon riba varios aspekto ku ta direktamente ligá ku e investigashon, entre otro e aspekto di finansiamentu di partidonan polítiko. Debí ku ta na yüli numa el a haña e kaso, abogado Knoops a pidi Korte pa duné tempu pa kaba su investigashonnan. Segun Knoops e posiblidat ta eksisti pa logra ku Korte ta deklará Ministerio Públiko no atmisibel, pero den kaso ku no ta asina, nan lo ta kla pa bringa e kaso. Hustamente p’esei nan ke hasi algun investigashon mas a fondo. Abogado Knoops a pidi Korte pa e skucha varios testigu ku e konsiderá relevante pa e kaso. Entre otro e ke pa skucha èks Hefe di VNA, Edsel Gumbs i èks hefe di MOT, Kenneth Dambruck. Gerrit Schotte a deklará den Korte ku durante tratamentu di e kaso den Promé Instansia, nan abogado a konsehá pa keda ketu. Segun Schotte awor si nan lo bai papia. Dia 16 di novèmber, wes lo bisa si e ta aprobá petishon di e abogadonan.