Den un rapòrt di dos sientífiko polisial a sali na kla, ku polisnan a komete varios eror durante aresto di e Arubiano, Mitch Henriquez. No solamente nan a choka Mitch ku un “grip” ku ta den diskushon, pero tambe nan a uza violensia demasiado lihé i nan tabata muchu lat ku asistensia médiko. E sientífikonan polisial a investigá e insidente mortal riba petishon di hues komisario.
Na momentu di e aresto, e agentenan polisial lo no a tene nan mes na e prosedura fiho ku ta instruí nan, ku nan tin ku tene nan mes na dje, na ora di un detenshon. Nan a aktuá muchu lihé, no tabatin guía, uzo di “pepperspray” tabata robes i a apliká asistensia médiko demasiado lat, asina ta pará den e rapòrt. “E uzo di violensia ku man pisá riba Henriquez tabata desproporshonal, sin kompashon i no adekuá”, asina un di e investigadónan a skibi. Ta akusá e sinku polisnan involví di maltrato pisá ku konsekuensha fatal.
Hustisia a disidí ku lo persiguí dos di e polisnan. Den un promé reakshon, famianan di Henriquez pa via di nan abogado a deklará ku nan no ta satisfecho ku e desishon di Korte. Según e amiga i yunan di Mitch, hustisia mester persiguí tur sinku polis. E rubiano di 42 aña, Mitch Henriquez a muri aña pasá den luna di yüni aparentemente pa falta di oksígeno, kousá pa un akshon ku man pisá di polisnan ku a arest’é . Esaki a sosodé durante un festival di músika den Zuiderpark na Den Haag.