Según un investigashon na Universidat di Gent, hendenan ku ta bestèl komestibel “online” lo ta kumprá mas salú, ku ora nan bishitá un supermerkado. Esnan ku ta hasi kompra físikamente den un supermerkado, hopi biaha ta kumpra kosnan insaludabel manera chips i chukulati, kompará ku hendenan ku ta hasi kompra “online”. Durante e estudio a analisá mas di 32.000 bishita na tiendanan di mas o ménos 4.300 konsumidó. E partisipantenan akí tabata konsistí di konsumidónan ku ta hasi kompra variá tantu “online” komo “offline”.
For di e investigashon a sali na kla ku ora un konsumidó hasi kompra “online” e ta kumpra un promedio di 5.7% na alimento insaludabel. Ora e mesun konsumidó kumpra den un tienda normal, e ta gasta 10.4% na alimento insaludabel.
E alimentonan insaludabel a ser partí den sinku kategoria (snèk salu, chips, chukulati, mangel) i den kada kategoria a haña e mesun relashon, esta ku “online” ta gasta proporshonalmente ménos na alimentashon insaludabel.
Segun e investigadónan, splikashon pa e fenómeno ta e diferensia den e presentashon di e produkto. Produktonan den supermerkado ta tenta mas i ta mas difísil pa resistí ku potrèt di snèknan i kos dushi den un tienda vitrual. Otro motibu importante ta ku ora bo kumpra un produkto den supermerkado bo por kom’é mesora.