Segun sifranan di CBS na Ulanda mas hòmber ta bira tata na un edat mas haltu. Di tur beibi ku a nase aña pasa na Hulanda, 5.1% tin un tata di 45 aña òf mas bieu. Dies aña pasa e porsentahe tabata 3.7%. Den e kategoria di edat di 40 pa 45 aña tambe tabatin un subida di 14.1 pa 16.1 porshento. No opstante esaki tatanan en general no a bira mas bieu. Na momentu di nasementu di un yu, un tata tabatin un promedio di 34.1 aña, kasi meskos ku e edat promedio di dies aña pasa. Ademas e edat ku hòmbernan ta bira tata pa promé bia, esta 32.5 aña, tambe a keda meskos ku dies aña pasa. E splikashon pa esaki ta ku no solamente tin mas tata ku edat haltu, pero tambe mas tata ku edat yòn. Por nota e subida mas tantu den e kategoria entre 25 pa 30 aña. Aña pasa 17.9% di beibinan tabatin un tata ku edat den e kategoria aki, kompará ku 15.7% na aña 2005. E edat promedio ku hende muhé ta bira mama pa promé bia tambe a kuminsá subi atrobe. Aña pasa hende muhé ku a haña yu pa promé tabatin un promedio di 29.6 aña, ku ta un rekòrt. Na 1971 hende muhénan tabatin e edat mas yòn pa haña yu, esta 24.3 aña.