E benifisiario prinsipal den hotèl Plasa, Giro Bank no ta mira otro alternativa, ku ta di bende e hotèl na findishi. Plasa hotèl tin algun dia será, debí ku Aqualectra a kòrta awa i koriente di e edifisio. No opstante diferente areglo di pago, debe di hotèl na Aqualectra a yega un suma di 700-mil florin, loke a pone ku e kompania di utilidat mester a tuma akshon. Giro Bank a tuma algun medida di seguridat, pa evitá sakeo di e hotèl. A pone seguridat i iluminashon temporal. E situashon ku a surgi tin komo konsekuensia ku 50 trahadó mester bai kas, mientras nan ta pendiente di loke ta bai pasa. A akomodá e huespetnan ku tabata den e hotèl den otro hotèlnan. Segun informenan lo tin intresado pa kumpra e hotèl. Entre otro tin papiá di un grupo chines ku lo ta intresá den hotèl Plasa. Den pasado Plasa hotèl tabata un di e hotèlnan mas renombrá na Kòrsou, ku a karga entre otro e nòmbernan di Hotel Intercontinental, Curaçao Plasa Hotel i Van Der Valk Hotel.