InselAir a aserká gobièrnu pa yuda yega na un solushon pa e situashon finansiero den kuá e liña di aviashon ta'den. Konseho di Minister a honra e petishon i a apuntá un komishon di eksperto pa hasi un investigashon riba e estado di e kompania. E komishon mester bin ku posibel solushonnan pa e problema finansiero. Segun deklarashonnan di e direktor Edward Heerenveen, e situashon aktual ta konsekuensia di fakturanan habrí na Venezuela, di kual suma a yega 100 mion dòler. Den un komunikado pa prensa, gobièrnu a indiká ku no ta deseabel pa e situashon aktual dje kompania dura mas largu, pasó esaki tin konsekuensia pa maneho diario di e kompania. E kompania ta e konekshon aéreo mas importante for i pa Kòrsou i gobièrnu ta haña bon konekshon di transporte aéreo, algu importante pa e isla. Falta di konekshon por tin konsekuensianan grave pa ekonomia i mester purba di evitá esaki mas tantu posibel. E komishon ku lo hasi e investigashon ta bou di guia di èks promé minister Ettiene Ys. E otro miembronan ta ekspertonan riba tereno di aviashon i finansa. E komishon mester reportá na un grupo den Konseho di Minister ku ta konsistí di ministernan demishonario Susy Camelia-Römer di Trafiko, Transporte i Planifikashon Urbano, Jose Jardim di Finansa i Eugene Rhuggenaath di Desaroyo Ekonómiko. Aki tres siman lo reportá tokante e resultado i rekomendashonnan pa gobièrnu determiná e siguiente pasonan ku lo tuma pa ku futuro di InselAir.