Hensley Muelens mester a kambia su strategiá pa e kampionato di World Baseball Classic 2017, debí ku ya nan no ta un ekipo deskonosí. “Si den pasado tim Kingdom of The Netherlands, tabata relativamente deskonosí, awor esei no ta e kaso mas,” segun Hensley. Despues ku e ekipo di reino a gana e di 22 título, komo kampeon oropeo, nan a subi te na di nuebe lugá riba “ranking” mundial. Esaki a hasi e tim di reino, e mihó ekipo oropeo i e hecho akí lo pone ku kontrinkantenan lo tene mas kuenta ku e selekshon di reino. “Den kada torneo te awor, nos a hasi algu spesial,” asina Meulens ta sigui splika. “Na 2006 Shairon Martis a tira ‘no hitter’ kontra selekshon di Panama. Na 2009 nos a alkansá e di dos ronda, danki na un tremendo viktoria riba e ekipo di Repúblika Dominikana, ku tabata yená ku hungadónan di MLB. Na 2013 nos a logra hasta pa yega semi-final, kemen nos ta riba e bon kaminda,” e mènedjer di tim Kingdom of The Netherlands a splika. Djamars 7 di mart pa 4:30 di marduga, ora di Kòrsou, e tim di reino ta hunga su promé wega kontra Sur Korea.