Eugene Rhuggenaath a bira e lider nobo pa PAR.


Djaluna anochi durante un konferensia di prensa na sede di partido PAR, a anunsiá e aktual minister demishonario Eugene Rhuggenaath komo e próksimo lider pa PAR. Segun Rhuggenaath, despues ku gobièrnu a kai, e aktual lider Zita Jesus-Leito a puntr’é si e lo ta kla pa e próksimo reto komo lider dje partido. Pueblo por skohe ki tipo di liderazgo e ke,sea pa desensia òf pa dekadensia. Eugene Rhuggenaath a ekspresá palabranan di apresio pa e lider polítiko saliente, Zita Jesus-Leito. El a bisa ku ta ku gran honor e ta risibí e batuta. E momentu aki a yega despues ku el a pasa e trayekto i a mira diferente lider polítiko. Komo hóben Parista e tabata tei presente na transishon di e lider fundadó Miguel Pourier pa Etienne Ys. E tabata testigu tambe dje traspaso di Etienne pa sra. Emily de Jongh-Elhage. Finalmente el a mira kon Zita a tuma e batuta, pero komo Parista nunka el a pensa di ta para komo lider polítiko. Rhuggenaath a sigui splika ku PAR ta un partido konosí pa transishon di liderazgo ehemplar, un partido ku ta duna hóbennan oportunidat pa krese i ku lidernan ku lo bai den historia komo gran sirbidónan di nos pais. Segun Rhuggenaath, nos ta na un momentu krusial i pais ta na un krusada importante. Tin preokupashon grandi den komunidat, tenshon, insertidumbre i hopi hende ta pèrdè speransa. Último tempu polítika a bira unu di individualismo, oportunismo i di destrukshon. Esei ta destruktivo pa nos ekonomia i bienestar. P’esei ta importante pa pueblo definitivamente skohe ki tipo di liderazgo e ke, ki tipo di gobièrnu e ke, ki tipo di pais e ke ta. E por skohe pa desensia òf pa dekadensia.

“Partijraad” di partido PAR a aproba e proposishon di Zita Jesus-Leito pa Eugene Rhuggenaath bira e lider nobo. Durante e dianan ku ta sigui lo formalisá e kambio den liderasgo di PAR. Dia 28 di aprel tin elekshon nobo pa Parlamentu di Kòrsou.