Durante IPKO, lo trata e reino ideal pa den futuro.


Ounke tin otro zonido na tur dos banda di osean atlántiko, Reino Ulandes lo bai sigur 20 aña mas. A lo ménos esaki ta loke e kuater kabesante di e delegashonnan ta sali fo’i dje ora nan topa den e siguiente IPKO (Interparlementair Koninkrijksoverleg) e siman aki.

E asina yamá Presidio (presídium) a pone riba agenda e punto : “E Reino Ideal na 2040” (Het ideale Koninkrijk in 2040). Ta e intenshon pa parlamentarionan di Kòrsou, Aruba, Sint Maarten i Ulanda deliberá promé den gruponan chikí riba e punto akí, pa despues trese e solushonnan den e pleno di parlamentonan.

Ta interesante pa wak na final kon ta bai atendé ku algún problema.

Den sierto gremionan na Kòrsou, Boneiru i Sint Maarten i Sint Eustatius kada bia di nobo, ta reina e deseo pa independensia, mientras na Ulanda tantu PVV, VVD komo SP ke terminá e relashon den Reino.

Anteriormente durante e aña akí, e vise-presidente di Raad van State, Piet Hein Donner a spièrta, ku si sigui chambuká asina’ki lo por nifiká final di Reino Ulandes.

E parlamentarionan di e parti karibense ya a yega Den Haag, kaminda primeramente lo trata e pre konsulta tripartit. E IPKO mes ta kuminsá djarason 14 di yüni.

Promé ku e IPKO tuma lugá tin e tradishonal deklarashon kòrtiku di e hefenan di e delegashon den e sala di reunion monumental di ‘Eerste Kamer’. Presidente pa e reunion akí, ta miembro di Eerste Kamer, Ruard Ganzevoort.

Durante e konsulta interparlamentario lo trata temanan manera : kambio di klima, hubentut, enseñansa, oportunidat ekonómiko den Reino, kuido di salubridat, diskriminashon i integridat di gobernashon. Huntu ku e temanan akí lo papia tambe riba e intrankilidat na Venezuela.