Lady Gaga i e agrupashon di ròk Metallica lo presentá huntu riba esenario durante e Grammy Awards djadumingu 12 di febrüari. Den un video riba un wèpsait di Gaga por mira e video di promoshon. Nòmber di otro aristanan ku tambe lo presentá ta entre otro Katy Perry, Chance The Rapper, Adele, Bruno Mars, The Weekend, Daft Punk i John Legend. E organisashon di Grammy Awards a informa ku e kantantenan Demi Lovato, Tori Kelly, Andra Day i Little Big Town lo trese un homenage na The Bee Gees, pa selebrá ku ta 40 aña pasa ku e pelíkula Saturday Night Fever a sali riba merkado. E agrupashon Bee Gees ta esan responsabel pa e piesanan di e pelíkula. Metallica tambe ta nominá e aña aki den e kategoria Mihó Piesa di Ròk ku e tema ‘Hardwired’. Den mesun kategoria ta nominá tambe, David Bowie, Radiohead, Twenty One Pilots i Highly Suspects. Lady Gaga no ta nominá pa Grammy debí ku su álbum Joanne no a sali riba merkado promé ku e “deadline” di Grammy’s. E presentashon di e show di Grammy ta den man di e popular presentadó James Corden, konosí pa su Carpool Karaoke.