Lidernan di partidonan den koalishon a kombersá ku partido Un Kòrsou Hustu di Omayra Leeflang, pa un posibel ampliashon di e koalishon aktual. A akordá ku tur partner den koalishon, ku den e dianan benidero lo analisá tur e puntonan ku a bin dilanti di parti di Un Kòrsou Hustu. Despues di esaki MAN lo yama un reunion ku tur partidonan den koalishon pa yega na un desishon final. Den un reunion ku a tuma lugá den fin di siman, e lidernan polítiko a haña un karta kaminda tin pará tur e puntonan ku segun Un Kòrsou Hustu, mester agregá na e akuerdo di gobernashon. E puntonan ta trata penshonadonan, empleo, bibiendanan sosial i enseñansa. Partidonan den koalishon a indiká ku mester di tempu pa evaluá e puntonan. Ademas tin di e puntonan ku mester mas splikashon. A referí entre otro na e punto di Un Kòrsou Hustu pa baha e prima di penshun pa seguro básiko pa penshonadonan i pa den e periodo di gobernashon aktual konstruí 800 kas. Sierto miembronan di koalishon ke mira promé e splikashon finansiero pa e proyektonan aki. E partido ta boga tambe pa introdukshon di un ombutsman pa mucha, konstrukshon di un planta di “Waste to Energy” kaminda Aqualectra i Selikor lo traha huntu i krea 50 kupo di trabou. Ademas, den kuadro di edukashon obligatorio, Un Kòrsou Hustu ke pone mas medio disponibel pa alimento, unifòrm i transpòrt pa muchanan di mayornan ménos pudiente.