Iris Mittenaere di Fransia ta gana Miss Universe.


Iris Mittenaere a keda skohé komo Miss Universe 2016. E kandidata di Fransia a keda eligí entre 86 beyesa ku a partisipá na e sertamen. Chanelle de Lau di Kòrsou, ku tabata entre e faboritonan den e dianan anterior, no a logra alkansá e rondanan final. Sinembargo el a hasi un bon papel den promoshon di Kòrsou i tabata hasta entre e sinku faboritonan den enkuenstanan riba retnan sosial, kaminda públiko por vota riba e damitanan. Pia Wurtzbach di Filipinas (Miss Universe 2015) a koroná e Mis Universo nobo, durante e seremonia ku a tuma lugá na Manila. Na desèmber aña pasá Iris Mittenaere, un hoben di 24 aña prosedente di Lille, a gana e sertamen di beyesa na Fransia i komo tal representashon di su pais durante e kompetensia máksimo. E premiashon final a keda repartí den entre Raquel Pélissier di Haiti ku a sali promé finalista i Andrea Tovar di Colombia ku a sali segundo finalista.

E ganadó lo karga e korona durante ún aña largu i na 2018 e lo koroná su siguidora den e próksimo sertamen ku probablemente lo tuma lugá na Fransia.