Ochentiun (81) Partido Polítiko a registrá pa e próksimo elekshonnan dia 15 mart na Hulanda. Dia 3 di febrüari, nan ta tende si nan por partisipá na e elekshonnan. Den e kaso ei, nan mester entregá nan lista di kandidatonan i otro dokumentunan. Konseho di Elekshon (Kiesraad) ku ta e urna elektoral sentral, ta anunsiá riba e e dia ei si e partidonan ku a dunan nan nòmber, ta kumpli ku tur kriteria. Partidonan ku keda rechasá, por apelá ainda.
E Konseho di Elekshon ta kontrolá por ehèmpel si huntu ku e lista di kandidatonan di partidonan nobo, tin sufisiente deklarashon di sosten, sino nan lo keda desaprobá.
Ademas kada kandidato mester duna un deklarashon ku e ta di akuerdo ku su nòmber ta riba un lista. Djamars 31 di yanüari, tur partido ta tende si tur formalidat ta na òrdu. E orei tambe Konseho di Elekshon ta menshoná kua ta e partidonan ku a entregá su lista.
Na elekshonnan anterior na 2012, tabatin 21 partido ku a partisipá for di e 48 partidonan ku a registrá. E biaka aki tin 81 partido ku ke laga registrá nan mes pa elekshonnan di mart 2017. Na elekshonnan di 1994, por a vota riba 26 partido i na 2002, 17 partido.
Tin un kos sí, esta si mas ku 32 partido partisipá na elekshonnan di 2017, esaki lo nifiká ku no por uza e “stembiljet” aktual di un banda so. Den e kaso ei Konseho di Elekshon a proponé pa laga imprentá un “stembiljet” di 70 pa 100 sèntimeter, pero ei riba tin lugá pa no mas ku 44 partido, sino e formulario ei tambe lo resultá demasiado chikí.
Na 1922, 43 partido a partisipá na elekshonnan na Hulanda.