Curaçao North Sea Jazz ta sigui den 2017


Den un komunikado Fundashon Bon Intenshon i Mojo Concerts a anunsiá ku ta bai tin un edishon di Curaçao North Sea Jazz Festival den 2017. Fundashon Bon Intenshon (FBI), Curaçao Tourism Development Foundation (CTDF), Curaçao Airport Holding (CAP) i Curaçao Investment & Export Promotion Agency (CINEX) a yega na un akuerdo riba esaki. E stakeholdernan aki lo kontribuí finansieramente, p’asina garantisá e evento lo sigui den futuro na Kòrsou.

Despues ku a anulá e evento luna pasá, Minister di Desaroyo Ekonómiko, Eugene Rhuggenaath a tuma akshon i a mobilisá CTDF. E evento ta trese miónes pa e isla di Kòrsou, pero e gastunan i risiko finansiero tabata enorme pa Fundashon Bon Intenshon. Den un tempu kòrtiku a yega na un akuerdo i asina garantisá kontinuidat di e evento te ku 2022.

Luna pasá Fundashon Bon Intenshon i Mojo Concerts a disidí na salta un aña, debí ku no ta por a kontratá artistanan prinsipal, paso nan no tabata riba gira durante e periodo di CNSJ. Awor ku a disidí pa tòg sigui e ku evento, Fundashon Bon Intenshon lo hasi su maksimo esfuerso, pa segurá un par di nòmber grandi pa e edishon di 2017.