Minister Rhuggenaath a firma akuerdo pa kontinuashon di CNSJ.


Curaçao North Sea Jazz Festival (CNSJF) ta sigui den 2017 i 2018. Esaki ta loke minister demishonario Eugene Rhuggenaath (PAR) di Desaroyo Ekonómiko (MEO) a deklará. Segun e minister tin un Memorandum of Understanding (MoU) riba mesa ku ta enserá tur “stakeholders”, manera por ehèmpel Fundashon Bon Intenshon i otro organisashonnan den e sektor turístiko, entre kuá Curaçao Tourist Board i Chata, ku tambe lo ta involví den e festival. Segun Rhuggenaath, esaki tin ku sòru pa e festival di mas grandi ku Kòrsou a yega di konosé, por sigui di forma duradero. Luna pasá Fundashon Bon Intenshon i Mojo Concerts, ku te awor, tur aña a organisá CNSJF, a anunsiá ku nan a disidí ku pa otro aña lo no organisá CNSJF mas. Motibu pa esaki tabata ku den e periodo durante kuá ta organisá e Festival di Jazz, no tin sufisiente “hoofdacts” (artistanan grandi) disponibel. Ademas ta hopi kostoso pa transportá e artistanan, nan músikonan, téknikonan i ekiponan, asina e organisashon a duna di konosé. Den nos komunidat i den eksterior tabatin hopi desapunto i duda, despues di e desishon. Pa hopi, CNSJF ya a bira un algu fiho. Rhuggenaath, ku ta un bishitante fiel di e festival di Jazz, mesora a bisa di bai hasi tur kos posibel, pa mantene e CNSJF. A manda un karta pa Gregory Elias di Fundashon Bon Intenshon i asina e bala a kuminsá lora. Te awor, e festival tabatin shete edishon fantástiko na Kòrsou ku finansiamentu kompletu di Fundashon Bon Intenshon di Gregory Elias. CNSJF a sòru pa un kantidat konsiderabel di sifranan turístiko positivo i entradanan haltu durante e temporada abou den turismo. Sinembargo e kontribushon di sektor turístiko tabata hopi tiki. Algu ku Fundashon Bon Intenshon a trese dilanti tambe na diferente okashon. Ounke ku na e momentu aki, te ainda no a duna interpretashon kon sektor turístiko ta bai duna kontenido na e CNSJF, di tur manera a hasi palabrashon pa sosten, asina Rhuggenaath ta indiká. Tur hende ta konsiente, ku ta bentahoso pa e isla si e festival kontinuá. Tur hende konosé e rapòrtnan di investigadó Tico Croes, den kuá tin un bista masha kla di e impakto ekonómiko ku e festival tin pa Kòrsou.