Diferente parlamentario tin hopi pregunta tokante e “Heads of Agreement” entre gobièrnu di Kòrsou ku e kompania chines Guandong Zhenrong.
Durante tratamentu di e topiko parlamentario Kenneth Gijsbertha pa frakshon di MAN a kuestioná ku tin diskrepansia den sifranan di invershon pa modernisashon i desaroyo di e forsa laboral. Segun Gijsbertha den e “Heads of Agreement” tin indikashon ku práktikamente hinter e sektor di energia lo bai pa Guandong Zhenrong. Kolega pa frakshon di MAN Elsa Rozendal, a bisa ku Kòrsou no por permití su mes un situashon ekonómiko malu despues di 2019 si refineria sera. Rozendal ta haña ku e proyekto pa modernisashon i invershonnan adishonal ta unu tremendo, pero e proseso pa firma un akuerdo ku ta mara Kòrsou pa 40 aña ta otro kuestion. E parlamentario ta haña ku promé minister demisionario a firma un akuerdo ku ta komprometé Kòrsou pa un periodo largu sin a trese esaki dilanti den Parlamento i esei no ta nèchi. Giselle McWilliam, tambe di frakshon di MAN tin diferente preokupashon relashoná ku e akuerdo. No tin klaridat tokante e prioridatnan di Guandong Zhenrong i e impakto kultural pa Kòrsou. McWilliam ta teme pa un revolushon chines na Kòrsou. McWilliam ke sa tambe kiko ta e kantidat eksakto di kupo di trabou direkto ku lo tin disponibel, ya ku modernisashon lo nifiká redukshon den kupo di trabou. E miembro independiente Eduard Braam ta kuestioná ku e prosesonan ta kanando demasiado lihé, spesial debí ku falta 37 luna promé ku e akuerdo ku PDVSA riba hürmentu di instalashonnan di Isla terminá. Segun Braam, riba papel e proyekto ta mustra bon, pero e resultado real ainda no ta konosí. Mester ta kouteloso ya ku China ta un poder mundial i mester di profeshonal pa komuniká riba nivel ku representantenan di Guandong Zhenrong. Parlamentario Omayra Leeflang di Un Kòrsou Hustu a kuestioná e tim multidisiplinario ku a keda lantá pa buska un kompania pa sigui ku e refineria despues di 2019. Segun Leeflang e tim no por sigui mas paso e grupo ta muchu grandi i no por negoshá di manera korekto. Leeflang ta haña ku mester bin ku un tim negoshadó, mas chikí i ku otro struktura. Segun Leeflang e tim multidisiplinario a gasta bastante sèn i e kier wak nan kuentanan anual. Pik Pisas, parlamentario pa MFK ta di akuerdo ku Kòrsou mester di un kompania pa invertí den renobashon di instalashonnan di Refineria Isla. Pero Pisas ta haña ku e manera ku e tim multidisiplinario a atendé ku esaki ta parse kuestionabel, ya ku pueblo meresé di haña tur informashon, debí ku ta trata aki di un akuerdo pa 40 aña. E Memorándum di Entendimentu (MOU) ta indiká un montante di 10 bion dòler, pero na momentu ku a kuminsá kuestioná esaki e la bira 5.5 bion i awor ta 3.4 bion. Despues di tuma nota di e kontrakt Gerrit Schotte a bisa ku a kita tur artíkulo pa protehé Kòrsou i su habitantenan. Schotte tambe a kuestioná e kontrakt ku minister presidente di Kòrsou Ben Whiteman, direktor di Refineria di Kòrsou José van den Wall Arnemann i mr.Chen Bingyan komo presidente di Guandong Zhenrong Holding, a firma. Schotter a konstatá tambe ku no a hasi un investigashon riba e kompanianan chines dor di hasi un audit. E ta haña esaki masha straño i MFK lo bini ku un moshon ya ku nan no ta di akuerdo ku e manera kon gobièrnu ta trata un topiko asina importante. Parlamentarionan Gerrit Schotte, Amparo Dos Santos, Marilyn Moses i Eduard Braam ta esnan ku a hasi un petishon pa pone e tópiko di firmamentu di e ‘Heads of Agreement’ entre gobièrnu di Kòrsou i grupo Guandong Zhenrong Energy Co. Ltd. riba agenda. Promé Minister Ben Whiteman a tende tur e preguntanan i a pidi dos siman pa por kontesta. Presidente di Parlamento Jaime Cordoba a skòrs e reunion pa tempu indefiní.