Partido Nashonal ta eksigí garantia di partnernan den koalishon.


Partido Nashonal di Pueblo, ta eksigí pa tur 11 miembro di Parlamento ku ta sostené koalishon, para tambe tras di e akuerdo di gobernashon. Segun e líder di PNP, Humphrey Davelaar, ta na momentu ku e gabinete nobo sinta, por tin un situashon úniko, kaminda tin e posibilidat ku 8 di e 11 miembronan den Paralemento ku a keda instalá, lo pasa pa forma parti di gobièrnu. Esei lo nifiká ku ta bin 8 miembro nobo den Paralamento.

E aktual miembronan den Parlamento, Hensley Koeiman, Kenneth Gijsbertha i Elsa Rozendal(MAN), Zita Jesus-Leito i Eugene Rhuggenaath (PAR), Suzy Camelia-Römer (PNP), Jaime Cordoba i Ruthmilda larmonie-Cecilia (PS) lo drenta den gobièrnu i lo tin di keda remplasá pa 8 miembro nobo den Parlamento.

Humphrey Davelaar a bisa : “Nos ta disponé di un mayoría mínimo di 11 for di 21 miembronan den Parlamento. Nos ke tin un gobièrnu mas sólido posibel”. Na prinsipio MAN, PAR, PNP i PS a kere ku nan tabatin un mayoría di 12. Pero e miembro i alabes presidente di PAR, a kibra ku partido, debí di malkontentu ku no a dun’é e kartera di Salubridat, Medio Ambiente i Naturalesa (GMN). Esaki a hasi ku e koalishon a keda ku sosten di un minimo di 11 miembro den Paralamento.