Ku tur probabilidat Kòrsou por tin un gobièrnu promé ku Pasku. Esei ta loke formadó Kenneth Gijsbertha (MAN) a deklará na e korant Antilliaans Dagblad. Segun Gijsbertha, e chèns ta grandi ku nos por tin un gobièrnu for di 15 di desèmber. “Nos tabatin e speransa ku lo por ta tin un gabinete nobo, promé ku 5 di desèmber, pero manera kosnan ta pinta aworaki, lo tin tratamentu di presupuesto promé i despues un gabinete nobo,” segun formadó Gijsbertha. Gijsbertha a indiká tambe ku den e dianan aki, lo tin e vershon definitivo di e akuerdo di gobernashon ku lo hiba di título “Dignidat humano ta sentral”.
A forma pa kada ministerio diferente komishon ku ta konsistí di miembronan di e partidonan den e koalishon nobo. E komishonnan lo trata puntonan ku lo mester adoptá den e akuerdo. Na e momentunan aki ta deliberá riba tur remarke i proposishon pa hasi adaptashonnan, ku bista riba e vershon final. E formadó a reakshoná di forma harí riba e pregunta pa un reakshon tokante un publikashon ku a sali den e matutino Ultimo Noticia. E korant ta hasi menshon ku Gijsbertha lo no ta ministeriabel, debí na konstrukshon di un vila luhoso, pa kuá e no a pidi hipotek. Ademas e lo tin un pèrmit pa konstrukshon i ku VDC lo a laga sa ku e formadó no tin rekurso pa traha un kas asina. E korant a dediká atenshon na e kaso, sin hasi menshon di e nòmber di Gijsbertha. Den e artíkulo ta spesifiká e diseño di e kas i ta kuestioná e echo di kon “Afpakteam” di Ministerio Públiko no a kuminsá ku investigashon ainda. “Mi ta skohe pa no reakshoná riba tipo di publikashonnan asina. Mi por bisa sí, ku pa bo por bira formadó, bo mester pasa un “screening”. Den e sentido ei, no ta lógiko pa pretendé ku lo mi no pasa”screening”, asina Gijsbertha ta splika.
Segun Ultimo Noticia, si no bini un klaridat den e asuntu, pronto nan lo e pone dokumentunan na disposishon pa afirmashon na públikashon.