Dia 27 di yanüari, e pelíkula Double Play (Changá), lo estrená mundialmente durante Festival Internashonal di Pelíkula na Rotterdam, asina IFFR a anunsiá ofisialmente. Faltando dos luna mas pa bai, nos ta anunsiá ku masha alegria e promé estreno mundial di Double Play di Ernest Dickerson. Un pelíkula tokante Kòrsou, su pasado i wega di dominó, basá riba e novela Dubbelspel (Changá) di Frank Martinus Arion, asina e komunikado ta bisa. E pelíkula Double Play, ta un adaptashon di e buki ku e mésun título, Dubbelspel. E novela di e outor kurasoleño, Frank Martinus Arion (1936-2015) ta duna na 1973 un bista úniko riba kultura i komunidat di Kòrsou, pa via di un historia sensashonal, ku hopi intriga i un wega di dominó. Double Play ta un inisiativa di Fundashon Bon Intenshon di Gregory Elias, huntu ku Lisa Cortés ku a tuma produkshon di e pelíkula na nan enkargo. Elias, no ta únikamente e finansiadó, pero tambe esun ku porfin a realisá e soño di e fayesido outor. Despues di hopi aña i hopi intento di otronan, e pelikula di e buki Dubbelspel ta bira realidat. Ademas, Elias komo produktor yen di entrega a envolví su mes ku e plan, imágen, eskoho di palabranan i esenanan magnífiko, pa di e manera ei Kòrsou i su hendenan por a bin dilanti i keda fotografiá.