Den un rueda di prensa, minister demishonario pa ministerio di Desaroyo Sosial, Labor i Bienestar, Ruthmilda Larmonie-Cecilia a ninga ku e la faya ku reglanan komo minister den e último dos añanan. El a reakshoná riba e krítikanan fuerte relashoná ku korupshon, ku a sali den medionan di komunikashon últimamente. A menshoná ku na 2014 i 2015 ministernan di Pueblo Soberano a firma pa 8.001.719 florin na gastu i a hasi esaki kontra di lei. Den su rapòrt Kontrolaria General a mustra ku diferente minister a firma sin outorisashon. Larmonie-Cicilia a bisa ku e rapòrt ta indiká ku diferente minister a faya ku e regla, pero ku segun e no tin para niun kaminda kla ku komo minister e no tin outorisashon pa firma. E la bisa ku su ministerio, esta SOAW, ta esun ku ta duna mas supsidio i realidat ta ku a firma pa hopi supsidio i hopi proyekto. E minister a deklará ku tur bòn ku el a firma for di ougùstùs 2014 a bai pa Ministerio di Finansa tres bia promé ku por paga e sèn. Pa dos aña largu el a hasi esaki den e mesun trayekto i nunka a bisé ku esaki no ta korekto.