
Marc Anthony ta bai divorsiá di su kasá Shannon De Lima. E motibu lo ta e sunchi ku Marc Anthony i Jennifer Lopez a duna otro riba esenario durante entrega di e premionan Latin Grammy. Ya pa basta tempu kaba e matrimonia di Marc Anthony (48) i De Lima (28) no ta kana bon. Na 2014 nan a kasa na Repúblika Dominikana. Na 2013 kaba, Anthony i De Lima a separá pa un tempu kòrtiku. Awor ku e dosnan ta bai divorsiá, rumornan a lanta ku Marc lo ta bai bèk serka Jennifer Lopez. Últimamente por a mira Jennifer i Marc hopi huntu. Aktualmente Jennifer Lopez ta trahando riba su album nobo na spaño i ta Marc Anthony ta esun ku ta produsí e album. Durante su presentashon den Latin Grammy, Marc Anthony no tabatin su renchi di kasamentu bistí. E artista a haña e rekonosimentu komo Persona di Aña. El a dediká e premio na su yunan i na tur esnan ku a bis’é ku e lo no logra den su karera komo kantante. Marc Anthony tin seis yu, di kuá dos ku Jennifer Lopez. Segun TMZ, e tim di maneho di Jennifer a bisa ku apsolutamente nan dos no ta bai bèk ku otro. Na 2011 Jennifer i Marc a divorsiá despues di un matrimonio di shete aña. Ta remarkabel sinembargo ku nèt awor aki Jennifer Lopez tambe a separá di su pareha Casper Smart. Promé ku Shannon De Lima i Jennifer Lopez, Marc Anthony tabata kasá tambe ku Dayanara Torres.