Den un kontienda elektoral hopi pèrta i sorpresivo pa hopi, e republikano Donald Trump, ta gana presidensia merikano. Ya for di tempran ora urnanan a sera, por a nota ku e resultadonan ku a kuminsá drenta, tabata kontrali na vários enkuesta ku tabatin Hillary Clinton komo faborito. Basikamente durante hinter anochi, bai kue mardugá Donald Trump a keda den delantera. Tabata na un okashon so durante anochi ku Clinton tabatin mas tantu voto elektoral ku Trump. Mientras ku ainda tabata falta resultado di algun estado, e lider di kampaña pa e partido demókratiko John Podesta a subi tarima pa anunsiá ku Hillary Clinton lo no papia. El a pidi e simpatisantenan pa bai kas numa i ku e siguiente dia nan lo tende di Clinton. Di otro banda Donald Trump sí a yega na e sede prinsipal akompaña pa su famia i vise kandidato Mike Pence. Mientras ku Trump tabata falta apenas dos voto elektoral pa yega e kantidat ofisial di 270 voto elektoral, pa ofisialmente keda deklará Presidente di Merka, CNN a raportá ku Hillary Clinton a yama Donald Trump. Clinton di e manera ei a aseptá su derota i a felisitá presidente elekto Donald Trump. Den su spich di viktoria Donald Trump a bisa ku Clinton a yamé i a pidi pa merikano pa huntu traha riba union. “Lo mi ta un presidente pa tur merikano,” asina Trump a bisa su simpatisantenan ku a keda warda ta lat, riba nan presidente nobo.
