Ta kiko Dean Rozier a bai hasi serka Parlamentario Cordoba den pleno formashon?


Presensia di Dean Rozier den edifisio di parlamento, nèt na un momentu krusial durante e proseso di formashon di gobièrnu, a kousa basta konsternashon den oranan di djamars atardi. Rozier tabata di bishita serka Parlamentario Jaime Cordoba di Pueblo Soberano. Según Rozier tabata un bishita komún. Di otro banda Parlamentario Amparo Dos Santos den un deklarashon na varios miembro di prensa ku tabata presente na e sitio a bisa ku el a tuma nota di un transakshon di plaka ku tabata tuma lugá den kantor di Parlamentario Cordoba : “Mi ta kalkulá ku por ta 25 pa 30 mil,” asina Dos Santos a bisa e periodistanan. Otro Parlamentarionan ku tabata presente a splika ku Rozier lo tabatin un papel ku un posibel formashon di gobièrnu ariba. Segun Gerrit Schotte, Parlamentario pa MFK, mientras ku Rozier tabata serka Cordoba, e tabata yama i manda mensahe pa otronan via su mobil. Jacinta Constancia ku tambe a papia ku e periodistanan, tabata hopi rabia, debí ku e no por a komprondé presensia di Rozier serka Cordoba. Según e Parlamentario, Rozier no a partisipá na e kontienda elektoral, pues ta ki mishi’é ta mete awor den e proseso di formashon. Según Constancia, Dean Rozier ta sirbi komo mucha mandá di gruponan finansiero ku ke purba kumpra influensia. Mas lat anochi, Cordoba i Rozier a sali huntu for di e edifisio di Parlamento. Rozier no por a duna otro motibu, sino ku simplemente tabata un bishita di kortesia ku el a hasi serka Cordoba i ku nan no a papia riba formashon.