E kantante di salsa Gilberto Santa Rosa a kibra rèkert mundial di Guinness pa mas tantu álbum na puesto number un riba e lista di álbum Tropikal di Billboard. Den fin di siman a presentá e premio na e artista den Madison Square Garden na New York. For di 1985, na 12 okashon Gilberto Santa Rosa a logra alkansá un puesto riba e lista. Esaki ta mas ku kualke otro artista. Victor Manuelle ta e artsita ku sigui Santa Rosa. Durante e konsierto La Salsa Vive, The Concert den Madison Square Garden Guinness World Records a entrega e premio. Aparte di Santa Rosa, otro artistanan den e género tropikal ku a presentá tabata El Gran Combo, Ruben Blades i Jose Alberto “El Canario”. Gilberto Santa Rosa a kuminsá ku su karera den añanan 80 i a alkansá puesto number 1 na 1992 ku su álbum Perspectiva. E produkshon a pa 10 siman na e puesto di honor.
Esaki ta e lista di e 12 álbumnan di Santa Rosa ku e yega number 1:
Perspectiva - yanüari 1992 (10 siman)
Esencia - desèmber 1996 (4 siman)
Intenso - mei 2001 (2 siman)
Viceversa – sèptèmber 2002 (8 siman)
Autentico - sèptèmber 2004 (1 siman)
Asi Es Nuestra Navidad (ku El Gran Combo) - desèmber 2005 (2 siman) Dos Soneros, Una Historia (ku Victor Manulle) - desèmber 2005 (3 siman)
Directo Al Corazon - aprel 2006 (2 siman)
Una Navidad Con Gilberto – desèmber 2008 (3 siman)
El Caballero De La Salsa: La Historia Tropical - mei 2009 (1 siman)
Irrepetible – yüli 2010 (1 siman) Necesito Un Bolero – febrüari 2015 (1 siman)
Aparte di su logronan ku e álbumnan, Gilberto Santa Rosa a logra tambe diferente hit ku su piesanan. E tin dies piesa den e Top-10 riba e lista di Hot Latin Songs.