Minister demishonario pa Desaroyo Ekonómiko, Eugene Rhuggenaath, ta spera ku benta di Plaza Hotel, situá den Punda, por tuma lugá mas lihé posibel. A anunsiá resientemente ku tin vários kumpradó interesá, pero e minister no kera anunsiá ken ta e posibel kumpradónan. The Curaçao Investment & Export Promotion Agency (CINEX), ku ta hunga un parti importante den e proseso komo fasilitadó, tambe a preferá di no duna komentario riba e desaroyonan nobo rondó dje hotèl. E organisashon tin kontakto ku diferente kreditor, inkluso Aqualectra i Banko di Seguro Sosial (SVB). E hotel tin miónes na debe serka prinsipalmente e dos kreditornan akí. Na luna di sèptèmber, Aqualectra a laga kita koriente, pasó no a paga resibu. Despues di intervenshon di parti di CINEX, a rekonektá e hotel riba ret di koriente. Aktualmente e hotèl ta propiedat di Layne Rachowicz, ku ta e úniko doño ku a keda despues di un konflikto ku a tuma lugá hopi aña atras, entre dos sosio. E situashon di e hotèl a sigui bai atras. Tin muchu tiki huespet i henter e edifisio ta den un nesesidat urgente di renobashon.