top of page

E astronouta merikano, Shane Kimbrough lo vota for di den espasio.


E astronouta merikano, Shane Kimbrough, lo basha su bala pa elekshon presidensial na Merka, for di den e nave espasial internashonal, International Space Ship. E kompleho ku ta keda na 400 km riba planeta Tera, ta un urna elektoral temporal pa e úniko merikano na bordo. Pasó pafó di planeta Tera tambe merikanonan ta mantené nan derechi di vota.

E organisashonnan espasial merikano, NASA, a splika djadumingu kon e votashon ta bai den espasio. E dirigente di buelo ta manda un karchi di vota digital den espasio. E astronouta por yena esaki riba e dia di elekshonnan i manda esaki bèk seyá via i-meil. Un funshonario di gobièrnu na Houston, siudat di kas di NASA, ta risibí e voto i ta konta esaki huntu ku demas votonan. Astronoutanan ta mira votashon komo un deber síviko i nan ke duna komo ko-siudadano un bon ehèmpel.

"Mas tantu nos por hasi pa laga pueblo vota, mas mihó. Si e hòmber aki por vota for di espasio, ami tambe mester por kore yega na mi urna di vota”, asina astronouta Leroy Chiao, a bisa algun aña pasá. Na 2004 Chiao tabata e promé astronouta merikano ku a vota for di espasio, den un elekshon pa presidensia.

bottom of page