Di kon elekshon na Merka ta riba un djamars?

Merka ta bai selebrá elekshon riba un djamars, ku ta un dia di trabou den novèmber pa motibu di un lei ku nan a traha, tempu ku ainda Merka tabata un pais di agrikultura. Na 1845 tur hende tabata move den garoshi halá pa kabainan of riba kabai i ta solamente hende blanku tabata por a vota. Den e aña ei Kongreso na Merka a disidí pa uniformá e kalènder elektoral i stablesé esaki riba un dia despues di e promé djaluna den novèmber. Riba e dia ei tabata kaba di kosechá i ainda e klima tabata pèrmití bon kondishon di wer. Ademas di e manera ei kier a evitá ku e dia di votashon, ta a kai pareu ku e seramentu di kuenta mensual di komersiantenan. Òf ku e dia di votashon ta kai riba mesun di ku e fiesta di Tur Santu di e katólikonan.

Den e Merka di e tempu ei di kunuku i agrikultura, mayoria di e siudadanonan mester a hasi un biahe largu pa bai vota na e sede di e kondadonan. Transporte tabat bai poko poko den garoshi òf riba kabai. Esei a pone ku tabata imposibel pa por a eligí djaluna komo dia di elekshon, ya ku den e kaso ei hopi hende lo mester a kuminsá e trayekto di biahe pa bai vota riba djadumingu. Pero djadumingu no por a kuminsá biaha debí ku dia di iglesia i orashon pa kristiannan.

Si a pone votashon riba djasabra, lo a saka hudiunan for di elekshon, ya ku hudiunan ta selebrá nan sabat riba djasabra. Awendia, 171 aña despues, Estadonan Uní di Merka, ta sigui vota riba djamars, maske kon difísil esei por resultá pa e hendenan bai urna riba un dia nòrmal di trabou.