BAB ta bai atendé ku OB riba hür di apartamentu.


Durante un konferensha di prensa di CTB, BAB a informá ku ta bai kuminsá atendé ku doñonan di apartamentu ku no ta kumpli ku e lei di OB. Tin sigur mas ku 300 apartamentu na Kòrsou ku no ta paga OB, siendo ku otronan si ta paga. Tin un kalkulashon ku tin entre 8 pa 10 mion florin di impuesto ku mester a paga riba kambernan di hotèl i apartamentu. Doñonan di apartamentu tin ku paga 7% di OB riba e tarifa ku nan ta kobra pa apartamentu. Parti di e impuestonan aki ta bai pa CTB por kubri gastunan di merkadeo i promoshon. Algu ku e doñonan di apartamentu tambe ta benefisiá di dje. Ta importante ku ta eksistí igualdat den e sektor di turismo, en partikular den e parti di akomodashon kaminda tur hende ta kumpli ku nan obligashon. Mariela Bentoera di Departamento di Inspekshon di Impuesto a splika ku entrante promé di yanüari 2016 a kuminsá kobra OB riba apartamentonan. Anteriormente tabata kobra LGB (Logeer-Gasten Belasting) di 7% riba hür di kambernan di hotèl i apartamentu. Un persona ku no tin un negoshi pero ku ta hür apartamentu riba su mes, ántes lo por a paga e LGB ku su ID, pero den e kaso di pago di OB e prosedura ta diferente. Pa por hasi deklarashon di OB un persona mester ta registrá komo empresario. Konsekuentemente doñonan di apartamentu mester bai na Inspekshon i registrá pa por haña un ‘CRIB nummer’ pa usa na ora di paga OB. No mester lubidá ku kumplimentu ku pago di OB riba apartamentunan ta ankra den lei.