Investigashon nobo di FBI no tin influensha riba bentaha di Clinton.


Según e mas resiente enkuestanan, e kandidato presidensial demókrata, Hillary Clinton, ta mantené bentaha riba su oponente republikano, Donald Trump. Den un enkuesta di NBC News, despues di e notisia ku FBI ta habri atrobe e investigashon di e i-meilnan ku Clinton a manda komo minister, no a surgi masha kambio. Ta parse ku e notisia tabatin poko influensia riba kon merikanonan lo bai vota. Di e personanan enkuestá, 47% lo vota pa Clinton i 41% pa Trump. Den otro senario kaminda no ta tene kuenta ku e dos kandidatonan independiente, ku ta partisipá na e elekshonnan, Clinton tin mas bentaha ainda riba Trump, 51% kontra 44%. For di e enkuesta ta bin dilanti tambe ku 83% di e votantenan demókrata, ta mira e reapertura di investigashon riba e i-meilnan, komo un maniobra pa kita atenshon. Di orto banda 93% di e repúblikanonan ta haña e kuestion importante.

FBI a hasi investigashon di e i-meilnan ku Hillary Clinton a manda komo minister i ku el a “delete” for di su “server”. Esakinan tabata i-meilnan personal. Den verano FBI a sera e investigashon, sin akusá Clinton. Pero den e siman tras di lomba, a bolbe habri e kaso, pasó FBI a haña i-meilnan nobo riba telefòn di èks-miembro di kongreso, Anthony Weiner. Wiener su èks-esposa, Huma Abedin, ta aliadó masha yegá na Clinton i e i-meilnan por tin haber ku e kaso di e kandidato demókrata.

Hefe di FBI James Comey, ku ta miembro di e partido republikano, a haña krítika pisá, debí na e manera i e momentu, ku el a partisipá ku FBI ta bolbe habri e kaso. Riba esei tambe, el a aktua kontra di instrukshonnan di e minister di hustisia. Minister Loretta Lynch, pa promé ku e elekshonnan FBI bini ku mas notisia dilanti ku por ta polítikamente sensitivo.

Entretantu, den kuater estado, e Partido Demókrata a bai hues, pa motibu di un yamada di Donald Trump na su siguidónan, pa vigilá e asuntunan na e urnanan durante elekshon presidensial. Segun e kehonan, esaki ta parse un forma di intimidashon, pa votantenan ku ta pertenesé na otro gruponan di minoria. Demókratanan a bai hues na Pennsylvania, Nevada, Arizona i Ohio. Nan ta apelá riba e Voting Rights Act di 1965, ku a keda lantá kontra Ku Klux Klan. Donald Trump di su banda ta pretendé ku a manipulá e elekshonnan, pa yuda Hillary Clinton gana. Djamars dia ocho di novèmber, Merka ta vota.