E maldishon a kibra! Chicago Cubs ta gana World Series.


Despues di 108 aña, porfin e ekipo di Chicago Cubs a logra gana World Series di beisbòl na Merka, despues di un viktoria di 8 pa 6 riba e tim di Cleveland Indians. Chicago Cubs tabatin mester di 10 inning pa logra e hazaña den Progressive Field na Cleveland. Na 1908 tabata e último biaha ku e ekipo di Cubs a logra e título. Ku e viktoria nan a kibra tambe, e maldishon di Murphy ku a dura 71 aña. Riba un 6 di òktober na 1945, un kriadó di bestia yamá William “Billy” Sianis a bai Wrigley Field, pa wak wega kuater di e tim den World Series. Un problema a surgi, pasó Billy kier a drenta stadio ku su kabritu Murphy. No opstante ku tantu e bestia komo su doño tabatin un karchi, nan no kier a laga e kabritu drenta stadion. Aparte ku tabata prohibí pa bestia drenta den e stadion, e kabritu Murphy tabata hole stinki tambe. Según e leyenda, Sianis a rabia masha pisá maldishoná e ekipo. E di “Nunka mas Cubs lo no gana World Series, mientras nan no pèrmití kabritu drenta stadion”. I for di e tempu ei, nunka mas Chicago Cubs no a gana World Series, te ku awor.

Chicago Cubs ta bira e promé tim ku ta logra gana Word Series, despues ku nan tabata 3 pa 1 atras den e seri. E úniko ekipo ku a logra esaki promé tabata Kansas City Royals na 1985. Ku e viktoria di Chicago Cubs, Cleveland Indians ta bira awor e ekipo ku e periodo mas largu sin por gana World Series. Último biaha ku Cleveland a logra gana World Series tabata na aña 1948.