Segun FBI, no tin konekshon entre Rusia i Donald Trump.


Un di e alegashonnan fuerte ku a bin dilanti durante kampaña presidensial na Merka, ta e posibel konekshon i influensia di presidente Vladimir Putin den e kontienda. Na vários okashon demókratanan a mustra ku e presidente di Rusia ke purba influensiá resultado di elekshon na Merka. Nan a akusá e tim di Donald Trump di tin lasonan ku gobièrnu di Rusia. Den un reportahe di New York Times, nan a publiká djaluna, ku despues di un investigashon di mas ku un aña, FBI a konstatá ku no tin konekshon entre Trump i Rusia. Segun e reportahe, agentenan forénsiko a investigá posibel laso entre negoshinan di Trump ku Russian Bank. Ademas a investigá e relashon di un aliado di Trump, Paul Manafort, ku aktivistanan pro-Rusia na Ukraina. Na ougùstùs, Manafort a tuma su retiro for di e kampaña di Trump. Den un otro investigashon, New York Times a deskubrí vários maniobranan straño, pero nó ilegal, ku Donald Trump a hasi den añanan nobenta, pa evitá di paga impuesto.

Trump ta e úniko kandidato presidensial den historia polítiko di Merka ku no a publika su sifranan di impuesto.