![](https://static.wixstatic.com/media/8d73fb_3e3afd3e22d3436e8186486d44609454~mv2.png/v1/fill/w_49,h_32,al_c,q_85,usm_0.66_1.00_0.01,blur_2,enc_auto/8d73fb_3e3afd3e22d3436e8186486d44609454~mv2.png)
Siman pasá, 15 miembro nobo a huramentá pa drenta Parlamento di Sint Maarten. Manera kustumber a aprobá kredensialnan di e parlamentario nobonan. Durante e seremonia di huramentashon, gobernadó Eugene Holiday a pone énfasis riba importansia di stabilidat den gobernashon. Gobernadó a mustra e parlamentarionan tambe riba nan responsabilidat pa sostené formashon di un gobièrnu ku ta manehá interesnan di pueblo, tene gobièrnu responsabel pa su aktonan i inisiá òf aprobá leinan na fabor di gobernashon i mantenshon di orden. E miembronan ku a huramentá ta Theo Heyliger, Franklin Meyers, Claret Connor, Sidharth “Cookie” Bijlani i Tamara Leonard pa United People’s Party (UP). Pa National Alliance a huramentá William Marlin, Silveria Jacobs, Christophe Emmanuel, Rodolphe Samuel i Ardwell Irion. Pa United St.Martin Party (US Party) a drenta Frans Richardson, Silvio Matser i Chanel Brownbill. I pa Democratic Party (DP), e parlamentarionan nobo ta Sarah Wescot-Williams i Emil Lee.
A elegí Claret Connor komo e presidente i Rodolphe Samuel komo visepresidente di e Parlamento nobo na Sint Maarten. E formashon di gobièrnu no ta kla ainda i partidonan a haña tempu èkstra te ku 4 di novèmber. Riba e dia ei formadó mester entregá su relato final relashoná ku nombramentu di ministernan, na gobernadó. E proseso a tarda debí ku e parti di screening no a keda kla na tempu.