Polis a konfiská 289 kilo di koka den vèn na areopuerto.


Djadumingu mardugá alrededor di mitar di kuater, sentral di polis a risibí informashon ku personal di vigilansia di un kompania di karga na aeropuerto a nota presensia di un hòmber kurasoleño ku tabata aktua sospechoso den e besindario. Na momentu ku e personal a hasi un kòntròl mas profundo, nan a bin topa un di e hòmbernan ku un skèr di kòrta heru. Mesora a detené e sospechoso.

Na yegada di e unidat polisial a sigui investigá e kaso i a topa un vèn den serkania. Na momentu ku polis a habri e vèn, a topa un otro hòmber di nashonalidat Turko. Den e vèn polis a haña diferente tas ku tabata kontené pakinan di kokaina. Na tur a pisa 289 kilo di kokaina. A haña tambe un pistol ku dos kashi di bala yená i hanskun. Polis a konfiská e vèn ku kontenido pa mas investigashon. A presentá e dos hòmbernan dilanti di un fiskal ouksiliar ku a ordená nan enkarselamentu.

Den oranan di mainta e tim ku tabata investigá e kaso, a bai na un hotèl den area di Otrabanda i a tene un entrada hudisial den tres kamber di e hotèl. Aki polis a konfiská shete mil euro. Ademas polis a detené un hòmber i un dama di nashonalidat Turko i un hòmber Aleman. E trio tambe ta enkarselá pendiente di e investigashon ku ta sigui.