Siman pasá, 117 Studiante di e promé aña na St.Martinus University, na komienso di nan karera akadémiko a hasi nan huramentashon di Hippocrates, durante e seremonia di bachi blanku. E próksimo promé minister (pendiente formashon), Hensley Koeiman tabata invitado di onor na e akontesimentu. Despues ku e universidat a kambia di direktiva na 2011 i a muda pa Skèrpènè, el a krese di 1 pa 240 studiante i a organisá e seremonia pa di 13 biaha. Mayoria di e studiantenan ta bini di India, Canada i Merka. Nan ta hasi e promé dos aña di nan estudio na Kòrsou den e asina yamá rotashon klíniko. Despues nan ta plama bai diferente país. Seis di e studiantenan, aktualmente ta hasi nan pasantia (stage) na Sehos. Huramentashon di dòkternan (vershon juli 2011) : Awor ku mi ta drenta den profeshon di médiko, mi ta primintí ku lo mi sòru pa medisina di kalidat na fabor di mi próhimo i mi komunidat, manera ta na mi alkanse. Lo mi ehersé e profeshon di dòkter konsiente di mi responsabilidat i ku hopi presishon. Riba tur kos lo mi sòru pa mi pashèntnan, mehorá nan salú i suavisá nan sufrimentu. Lo mi informá mi pashèntnan korektamente.Lo mi mantené sekreto, loke mi sa di mi pashèntnan a base di mi profeshon, tambe despues ku nan fayesé. E profesornan i tur esnan ku a formá mi, lo mi sigui apresiá, pa loke nan a siñá miLo mi sigui aktualisá mi konosementu, lo mi no traspasá e fronteranan di mi posibilidatnan, i kaminda esei ta posibel lo mi kontribuí na progreso di e konosementu di medisina. Lo mi atendé di forma responsabel ku medionan ku komunidat ta ofresé i ta pone na disposishon i hasi lo máksimo pa un kuido di salú ku ta alkansabel pa un i tur. Lo mi komportá mi mes kolegial i yen di rèspèt pa ku mi koleganan.Lo mi sòru pa mi aktitut pa ku pashèntnan no ta keda influenshá dor di filosofia di bida, konvikshon polítiko, klase sosial, rasa, etnisidat, nashonalidat, idioma, sekso,preferensia seksual, edat, malesa òf limitashon. Lo mi respetá bida i dignidat humano. Te asta bou di preshon, lo mi no hasi uso di mi konosementu médiko pa práktikanan ku ta bai kontra humanidat. Esaki mi ta deklará solemnemente, for di boluntat liber i riba mi palabra di onor.