Churandy Martina ke bira "hacker".


Despues di su karera komo velosista, Churandy Martina lo ke bira "hacker". E lo ke usa su pashon pa e mundu di teknólogia pa yuda polis. Aktualmente Churandy ta di focus riba Weganan Olímpiko di 2020, pero e ta pensa tambe riba kiko e lo ke hasi despues."Ya mi tin plan kaba pa ora mi baha ku penshun. Lo mi ke bira 'hacker', pasó mi ta gusta teknólogia. Lo mi ke hasta bai skol bèk pa siña mas di esei. Lo mi ke bira un bon 'hacker' ya mi por yuda polis," asina Churandy a bisa e revista Running World. I no opstante di e deseo akí, lo mi no ke bandoná e deporte di atletismo. "Kisas ta mihó mi bira entrenadó e or'ei, ya mi por pasa mi konosementu pa hobennan," e yu di Kòrsou a deklará. "Mi ta kere ku lo mi ta un bon coach tambe, pa motibu di e hende ku mi ta".

Churandy ta plan tambe ku su fundashon, pa medio di kua e ta yuda hóbennan na Kòrsou. "Mi mester honesto. Últimamente mi no a hasi masha kos ku mi fundashon, pero den futuro lo mi ke bin ku un internat pa yuda hóbennan desaroyá nan talento. Tin hopi hoben na Kòrsou ku no tin hende pa yuda nan i ta importante pa nan haña ayudo, pasó si nos hobennan ta bon, e or'ei nos tur ta bon," asina Churandy Martina a bisa.