Djaluna mainta tempran, Wardakosta pa teritorio di Karibe Ulandes, a bolbe interseptá un gran kantidat di droga riba un “Go-fast”. E operador di radar di e Sentro di Reskate i Koordinashon di Wardakosta a detektá un embarkashon na kosta sùit di Kòrsou na altura di Cas Abou.
E avión Dash-8 di patruya di wardakosta i un boto Super Rhib ku a sali for di e punto di sosten na Kòrsou, a bai na e sitio pa mas investigashon. Ora nan a yega na e sitio, a bin topa un “Go-fast” sin tripulashon. Na bordo tabatain un kantidat grandi di droga. Despues di investigashon inisial a saka afó ku tabata trata di 15 paki grandi ku un total di 400 kilo di un supstansia paresido na kokaina. Kuerpo polisial a buska den bisindario pa mira si por haña e hendenan ku lo mester tabata na bordo di e “Go-fast, pero sin resultado satisfaktorio. A konfiská e boto i e 15 pakinan.
