Tin akuerdo pa forma koalishon ku 12 asiento.


Fuentenan konfiabel ta indiká ku partidonan a yega na un akuerdo pa forma un koalishon ku por konta un mayoria di 12 di e total di 21 asiento. Partidonan MAN, PAR, PNP i PS a bai di akuerdo pa forma un gobièrnu. Sinembargo falta ainda kon pa duna kontenido na e akuerdo.

Manera palabrá djamars 25 di òktober informadó Kenneth Gijsbertha, lo entregá su raportahe final na Gobernadó Lucille George-Wout. A base di e informashon ku informadó entregá na Gobernadó, esaki lo nombra un formadó ku lo sigui ku e parti di formashon di e gobièrnu nobo pa Kòrsou.

Manera e situashon ta aworaki, esei ta nifiká ku partidonan MFK di Gerrit Schotte, KdNT di Amparo Dos Santos, UKH di Omayra Leeflang i MP di Marylin Moses, lo tin ku tuma nan posishon den banki di oposishon. Gabinete demishonario di Kòrsou lo tin ku keda atendé kasonan pendiente, te na momentu di instalashon di un gabinete nobo.